Friday, October 13, 2017
प्रचण्डले छिर्के हान्दा बाबुरामले खोले आँखा, २ नम्बरबाट सीधै झरे ५९ नम्बरमा
असोज १७ गते राष्ट्रिय सभागृहमा भएको वाम गठबन्धन घोषणा कार्यक्रममा नेताहरुले एकअर्काको हात समातेर उचाल्दा बाबुरामको दायाँ हात नारायणकाजी श्रेष्ठले समातेका थिए भने घडी लगाएको बायाँ हात केपी ओलीले समातेका थिए। ओलीको बायाँ हात भने प्रचण्डले समातेका थिए। दायाँ हात समात्ने नारायणकाजी र ओलीको बायाँ हात समात्ने प्रचण्डले छिर्के हान्दा बाबुराम वाम गठबन्धनबाट बाहिरिन बाध्य भएका छन्। कार्यक्रममा ओलीले घोषणा गरेका थिए- बाबुरामजी सूर्य चिह्न लिएर चुनाव लड्नु हुन्छ। तर आज बाबुरामले नयाँ शक्ति पार्टीको सचिवालय बैठक डाकेर भट्टराईले वाम गठबन्धनबाट बाहिरिएको र अब गोरखाबाटै आँखा चुनाव चिह्न लिएर लड्न लागेको जानकारी गराएपछि ट्विट गरे- हाम्रा “आँखा” खुले! तपाईंको नि? चुरो कुरो गोरखाको उम्मेदवारी रहेछ।
बाबुराम गोरखा २ बाट प्रतिनिधि सभाको लागि प्रत्यक्ष उम्मेदवार बन्न चाहन्थे। तर माओवादी केन्द्रले त्यही ठाउँबाट नारायणकाजी श्रेष्ठलाई उठाउने भनिसकेका थिए। माओवादीले गोरखा १ छाड्न सक्ने तर सूर्य हैन हसियाहथौडाबाट उठ्ने भए मात्र भनेछन्। त्यो नभए काठमाडौँमा उठे हुन्छ भनेर बाबुरामलाई फँसाउन पो खोजे। काठमाडौँकाहरु पख्लास् हाम्रो घरमा डोजर लाउने बाबुराम चुनावमा उठे डोजर लाउँछौँ भनी तम्तयार भएर बसेका थाहा पाएका उनले मान्ने कुरै भएन।
ओलीसित कुरा गरे, प्रचण्डले छिर्के हानिसकेका, के मान्थे। घोषणा कार्यक्रममै अन्तिम अवस्थामा प्रवेश गरेका बाबुराम गुड्न लागेको बसमा सिट छ कि छैन भनी नसोधी छिरेको, पछि सिट खोज्दा नपाएपछि झर्न परेको अवस्थामा पुगे।
अन्ततः उनले १० दिनमै गठबन्धन छाडेको घोषणा गरे। कारणका रुपमा नेकपा एमाले र माओवादी केन्द्र साझा चुनाव चिन्ह प्रयोग गर्ने सहमतिको मर्म विपरीत गएको उल्लेख थियो। आजको प्रेस विज्ञप्ति यस्तो थियो
आज नयाँ शक्ति पार्टी, नेपालको संघीय सचिवालयको विस्तारित बैठक बस्यो । बैठकले गरेका निर्णयहरु जानकारीका लागि यो वक्तव्य जारी गरिएको छ:बैठकका निर्णयहरु:१. गठबन्धनमा आवद्ध नेकपा एमाले र माओवादी केन्द्र साझा चुनाव चिन्ह प्रयोग गर्ने सहमतिको मर्म विपरीत गएको हुनाले आगामी मंसीर १० र २१ गते हुन गइरहेको प्रतिनिधिसभा र प्रदेशसभाको निर्वाचनमा नयाँ शक्ति पार्टी, नेपाल आफ्नै चुनाव चिन्ह आँखा लिएर सहभागी हुने ।२. संविधानको आधारभूत अन्तरबस्तु (गणतन्त्र, संघीयता, धर्मनिरपेक्षता र समावेशीता) लाई अस्वीकार गर्ने राजनीतिक पार्टीहरु, व्यक्ति–व्यक्तित्वबाहेक सबैसँग संघ र प्रदेशस्तरमा चुनावी तालमेल गर्ने । तालमेल भएको क्षेत्रमा बाहेक संघ र प्रदेशका सबै निर्वाचन क्षेत्रहरुमा उम्मेद्वारी दिने । यसअघि नै निर्णय भइसकेका निम्न क्षेत्रहरुमा भने पूर्ववत् निर्णय अनुसार नै उम्मेद्वारी दिने:१. डा. बाबुराम भट्टराई – गोरखा–२
२. कृष्णकुमार चौधरी – कैलाली–३
३. दानबहादुर चौधरी – कपिलबस्तु–१
४. प्रेम तामाङ – रसुवा
५. मदन राई – खोटाङ३. समानुपातिकतर्फको बन्दसूची तयार पार्न कार्यालयलाई जिम्मेवारी दिने ।४. उम्मेद्वारीको तय गर्न साथै विभिन्न पक्षहरुसँग वार्ता–छलफल र आवश्यक निर्णय गर्न कार्यालयलाई अधिकार दिने ।– केन्द्रीय कार्यालय
नयाँ शक्ति पार्टी, नेपाल
के थियो त त्यो दिनको सहमतिमा?
बाबुरामले साझा चुनाव चिह्नको सहमतिको कुरा उठाए पनि ६ बुँदे सहमतिमा चुनाव चिह्नबारे केही उल्लेख छैन। नयाँ शक्ति र अन्य पार्टी र समूहका लागि आपसी सहमतिमा निर्वाचन क्षेत्र निर्धारण गर्ने भन्दै एमालेलाई ६० र माओवादी केन्द्रलाई ४० प्रतिशत हुने गरी आपसी तालमेल गर्ने चाहिँ लेखिएको छ।
सूर्य चुनाव चिह्नमा लडेको भए बाबुरामको चुनाव चिह्न मतपत्रमा दुई नम्बरमा हुन्थ्यो। तर अब आँखा नै लिएर लड्ने भनेपछि निर्वाचन आयोगको सूची अनुसार मतपत्रको ५९ औँ नम्बरमा पर्नेछ। त्यो पनि फेरि आँखा आँखा भनेर मात्र चुनाव चिह्न प्रचार भयो भने ६२ नम्बरको दुई आँखा चुनाव चिह्नमा छाप लगाउलान् भन्ने डर।
